Xəbərlər

Klassik Xalq Cəbhəsi Partiyasının (KXCP) sədri Mirmahmud Mirəlioğlunun Azərbaycan Xalq Cəbhəsi Partiyasının (AXCP) parçalanmasından sonrakı vəziyyəti haqqında söylədiyi fikirlər yeni müzakirələrə səbəb olub.

ERtv xəbər verir ki, 2000-ci ildə AXCP-nin parçalanmasından sonra ortaya çıxan legitimlik məsələsinə toxunan M.Mirəlioğlu bu sözləri deyib:

“Hesab edirik ki, “yurd”çu dostlarımız fərqindədirlər ki, onlar cəbhəçi deyillər. Amma ad bu gün onlardadır”.

Gözlənildiyi kimi, AXCP nümayəndələri onlar üçün çox həssas olan bu məsələnin üstündən sükutla keçməyiblər.

AXCP sədrinin müavini Fuad Qəhrəmanlı bu mövzuda “Yeni Müsavat”a verdiyi açıqlamada KXCP sədrini Milli Şurada təmsil olunan partiyalar arasında “təfriqə salmaqda” günahlandırıb.

KXCP sədri M.Mirəlioğlu ünvanına səsləndirilən ittihamla əlaqədar Gün.Az-a açıqlamasında bu barədə əlavə fikir bildirməyə ehtiyac olmadığını deyib:

“Mən həmin müsahibəmdə tarixi danışmışam, faktlar göstərmişəm. İndi dediklərimə kim necə reaksiya verirsə-versin, öz işidir. Hər kəsin istənilən məsələyə öz yanaşması var. Əlavə nəsə deməyə ehtiyac yoxdur”.