Xəbərlər

“Azərbaycan Respublikasında Dövlət Qulluğunda İslahatlar” İkitərəfli Layihəsinin başa çatması ilə bağlı mətbuat konfransı keçirilib. Mətbuat konfransında Azərbaycan prezidenti yanında Dövlət Qulluğu Məsələləri Komissiyasının sədri Bəhram Xəlilov bildirib ki, layihənin həyata keçirilməsinə 2009-cu ilin avqustundan başlanıb. Onun sözlərinə görə, “Azərbaycan Respublikasında Dövlət Qulluğunda İslahatlar” proqramının məqsədi Azərbaycanın mərkəzi icra hakimiyyət orqanlarında dövlət qulluğu sahəsində şəffaf və vətəndaş yönümlü fəaliyyətin inkişaf etdirilməsi, yaxşı idarəetmənin dəstəklənməsi olub. Sədr bildirib ki, layihənin işi komissiyanın təşkilatı imkanlarının gücləndirilməsi, dövlət qulluqçuları üçün təlim və ixtisas sisteminin yaradılması, bacarıqlar əsasında işəgötürmə sisteminin təkmilləşdirilməsi, dövlət qulluğu islahatı üçün strategiya və hüquqi müddəalarla bağlı məsləhət xidmətlərinin yaradılması kimi istiqamətləri əhatə edib. Almaniya Beynəlxalq Əməkdaşlıq Cəmiyyətinin Azərbaycan üzrə rəhbəri Henning Tveste bildirib ki, 5 il ərzində Azərbaycanla aparılan əməkdaşlıq çox məhsuldar keçib. Onun sözlərinə görə, gözə çarpan nəticələr əldə edilib və bu nəticələr digər ölkələrdə müsbət nümunə kimi istifadə edilə bilər. Henning Tveste qeyd edib ki, Azərbaycanın standartlaşdırılmış informasiya texnologiyaları əsasında işə qəbul etmə mexanizmi var ki, bu da regionda qabaqcıl nümunədir.