Xəbərlər

"Human Rights Watch" (HRW) hüquq müdafiə və digər bu kimi təşkilatlar sadəcə haradasa müxalifət mətbuatlarından və ağızdan eşitdikləri məlumatları toplayıb Azərbaycan haqqında mənfi rəy formalaşdırırlar. Bunu çərşənbə axşamı  təşkilatın Azərbaycanda mülkiyyət hüququnun pozulmasına dair məlumatını şərh edərkən hakim Yeni Azərbaycan Partiyasının (YAP) icra katibinin müavini Mübariz Qurbanlı deyib.

Qurbanlının sözlərinə görə, detallara varsaq, təhlillər aparsaq görərik ki, bu hesabatlar heç də Azərbaycan reallıqlarını əks etdirmir.

"Beynəlxalq aləmdə təşkilatlar var və həmin təşkilatlar zaman-zaman müxtəlif hesabatlar yayırlar. Bu hesabatlara çox da diqqət yetirmək lazım deyil, çünki bu hesabatlar birtərəfli hazırlanır və Azərbycandakı real vəziyyəti əks etdirmir. Ona görə də biz bu cür hesabatları tənqid edirik. Hesab edirik ki, həmin hesabatları hazırlayan və bu hesabatları tərtib edən şəxslər Azərbaycana gəlib, müxtəlif qurumların nümayəndələri ilə görüşlər keçirməlidirlər və bu görüşlərdə vəziyyəti yerindəcə təhlil edərək, bundan sonra hesabatı hazırlamalıdırlar", - o bildirib.