Xəbərlər

Yeni Azərbaycan Partiyasının Sədr müavini, icra katibi Əli Əhmədov cümə axşamı YAP Səbail rayon təşkilatının ərazisindəki ilk təşkilatların sədrləri ilə görüşüb.

Trend-in məlumatına görə, görüşdə Əhmədov seçkilər ili olan 2013-cü ildə partiyanın yerli strukturlarının fəalları ilə mütəmadi görüşlərin təşkil olunduğunu vurğulayıb. Onun sözlərinə görə, artıq 20-dək belə görüş keçirilib.

"Prezident seçkilərinin keçiriləcəyi 2013-cü il ölkəmizin siyasi həyatında böyük əhəmiyyətə malikdir. Bu səbəbdən Yeni Azərbaycan Partiyasının bütün üzvlərinin, təşkilatlarının fəallığının təmin edilməsinə diqqət ayrılmalıdır", - Əhmədov deyib.

YAP sədrinin müavini partiyanın ötən illər ərzində böyük seçki təcrübəsi topladığını qeyd edərək vurğulayıb ki, bu amil 2013-cü il seçkilərində də uğur qazanılacağına böyük zəmin yaradır.

Azərbaycan Prezidenti İlham Əliyevin rəhbərliyi altında ölkədə bütün sahələrdə dinamik inkişafın əldə olunduğunu deyən Əhmədov bu inkişafın bundan sonra da davam edəcəyinə inamını vurğulayıb.

"Ümummilli lider Heydər Əliyevin siyasi kursunun davamçısı olan Prezidenti İlham Əliyevin rəhbərliyi altında Azərbaycan ötən illər ərzində böyük inkişaf yolu keçib, regionda söz sahibinə çevrilib", - Əhmədov deyib.