Xəbərlər

Bu gün Azərbaycanın Baş naziri Artur Rasizadə Albaniyanın Baş naziri Sali Berişanın başçılıq etdiyi nümayəndə heyəti ilə görüşüb.

Nazirlər Kabinetindən  verilən məlumata görə, albaniyalı həmkarı ilə bir il əvvəl keçirdiyi görüşü xatırlayan Baş nazir Artur Rasizadə ötən dövr ərzində ölkəmizdə baş verən sosial-iqtisadi inkişaf tendensiyaları barədə ətraflı məlumat verib. Baş nazir albaniyalı həmkarının Bakıda keçirilən Dünya İqtisadi Forumunda iştirakını yüksək qiymətləndirib. Rasizadə bunu ölkələr arasında əməkdaşlıq əlaqələrinin daha da genişləndirilməsinə öz töhfəsini verəcəyinə əminliyini bildirib.

Forumun yüksək səviyyədə təşkil olunduğunu diqqətə çatdıran Sali Berişa Albaniyanın son illər Avropada baş verən iqtisadi böhrandan uğurla çıxdığını, hətta ölkəsinin sərmayələrin qoyuluşunda davamlılığı təmin edə bildiyini də vurğulayıb. Qeyd edilib ki, iqtisadiyyatın inkişafında yüksəliş əldə etmək üçün bir çox sahələrdə güzəştlər edilib, xüsusilə istehsal üçün ölkəyə gətirilən xammal vergidən azad olunub. Həmçinin kənd təsərrüfatı sahəsində istehsal olunan məhsullar vergidən azad olunub.

Sonda Azərbaycan Respublikası Hökuməti və Albaniya Respublikası Nazirlər Şurası arasında əməkdaşlığa dair saziş imzalanıb.