Xəbərlər

Bu gün İtaliyada fevralın 25-dək davam edəcək parlament seçkilərinə start verilib.  RİA Novostiyə istinadən verdiyi məlumata görə, bu gün seçki məntəqələri saat 10:00-da açılacaq və seçki axşamadək davam edəcək. Fevralın 25-də isə seçki məntəqələri saat 09:00-dan 17:00-dək isləyəcək. İtaliyanın daxil işlər nazirliyinin məlumatına görə, ölkədə potensial seçicinin sayı 47 milyon nəfərdir.

Məlumatda bildirilir ki, seçkilərə 2 gün qalmış keçirilmiş sosial sorğunun nəticələrinə görə, sol Demokratik partiyanın və onun lideri Perluici Bersaninin sağ-mərkəzçilər və keçmiş baş nazir Silvio Berluskoni qarşısında 5 faizlik üstünlüyü var.

Üçüncü yeri aktyor Beppe Qrillonun rəhbərlik etdiyi "5 ulduz hərəkatı" tutur.

Mərkəzçilər və indiki baş nazir Mario Monti 4-cü yerdə qərarlaşıb.

Lakin aparıcı siyasi qüvvələr M.Montiyə hökumətin formalaşdırılması üçün müraciət edə bilər. Bir müddət öncə M.Monti deyib ki, onlar solçularla koalisiya yarada bilməzlər.

Qeyd edək ki, İtaliyada keçirilən parlament seçkiləri həm yuxarı, həm də aşağı palata üçündür. Senat üçün seçkilər regional əsasda keçirilir və burada yalnız 25 yaşı tamam olmuş və yuxarı olan vətəndaşlar iştirak edə bilər.

İtaliyadakı seçkilərin nəticələri isə Brüsseldə narahatçılıq yaradır. Çünki, yeni hökumətin iqtisadi büdcədə ciddi dəyişiklərin olunmasından imtina etməsi ehtimalları var.