Xəbərlər

“Böyük səhnə” beynəlxalq layihəsinin finalında musiqi həvəskarlarını bir çox sürprizlər gözləyir. Onlardan biri 2011-ci ilin “Eurovision” müsabiqəsinin qalibi Eldar Qasımovun yeni mahnısının təqdimatıdır. 
“HeartBreaker” mahnısı şənbə günü, fevralın 16-da ATV kanalının efirində “Böyük səhnə” layihəsinin finalında səsləndiriləcəkdir. 
“HeartBreaker” mahnısının musiqisini bəstəkar və prodüser İsa Məlikov, mətnini Qreys Ceyms, Eldar Qasımov (Ell) yazmışlar, musiqi prodüseri Danimarka bəstəkarı Bo Larsendir. 
Xatırladırıq ki, şounun superkastinqindən 12 iştirakçı keçmişdir. Ötən həftə onlardan altısı qalmışdır. Yalnız üç nəfər superfinala çıxacaqdır. Finalda münsiflər heyətinin üzvləri Tom Rotrok və Harri Miller (ABŞ), Təranə Muradova, Zara Bədəlbəyli, Eldar Mansurov və Murad Dadaşov (Azərbaycan), habelə isveçli Stefan Orndur. 
Layihə Azərbaycan Gənclər və İdman Nazirliyinin dəstəyi ilə həyata keçirilir. Kreativ və texniki təminat Euromedia şirkətinindir.