Xəbərlər

 Bu il yeni layihə - Xəzər dənizi ətrafında avtomobil yürüşü start götürür. 
Rusiya kütləvi informasiya vasitələrinə istinadla xəbər verir ki, layihənin təşəbbüskarları ictimai xadimlər, avtomobilsevərlər, jurnalistlər və bloqqerlərdir. Bir qrup avtoyürüşçü 17-18 gün ərzində 10-12 maşında Xəzəryanı 5 ölkənin və 3 regionun ərazisindən keçən yürüş məsafəsini qət edəcəkdir. Yürüşün təxmini marşrutu belədir: Həştərxan - Atırau (Qazaxıstan) – Beyneu (Qazaxıstan) - Nukus (Özbəkistan) - Köhnə Ürgənc (Türkmənistan) – Qorqan (İran) - Rəşt (İran) – Bakı (Azərbaycan) - Mahaçqala (Dağıstan) – Həştərxandır. Yürüşdə təxminən 25-35 adam iştirak edəcəkdir. 
Avtoyürüşün xüsusi embleminin işlənib hazırlanması üçün jurnalistlər və bloqqerlər arasında müsabiqə keçiriləcəkdir. Müsabiqənin qalibi avtosəyyahlar qrupuna daxil edilə bilər. 
İşçi qrupun üzvləri avtoyürüşün başlıca mövzularını müəyyən etmişlər: mədəni turizm, ekoloji təhlükəsizlik və dövlətlər arasında əlaqələrin möhkəmləndirilməsi.
Yürüşün dəqiq vaxtı müəyyən edilməmişdir, lakin hələlik 2013-cü ilin oktyabr ayına planlaşdırılır