Xəbərlər

 EL TV-yə istinadən xəbər verir ki, əkin sahələrinin suvarılmasında su çatışmazlığından əziyyət çəkən rayonlardan biri də Bərdədir. Əvvəllər rayon ərazisində 10-dan çox süni göl olub.  Eyni zamanda su anbarları funksiyasını yerinə yetirən bu göllərdən 5-i  Xan Ərəb kəndinin ərazisində yaradılıb. Burada yığılan sudan
Soğanverdilər, Piyadalar, İmirli, Şərəfli, Xan Ərəb və Bəcirəvan kəndlərindəki əkin sahələrinin suvarılmasında istifadə edilib. Uzun illər ərzində kəndlilər əziyyət çəkmədən öz təsərrüfatını suvara biliblər. 

İndi isə həmin göllərin hamısı susuz qalıb. Həmçinin alternativ su mənbələrinin quruması həmin göllərdəki canlıların da məhvinə səbəb olub. Halbuki göllərin ətrafında yerləşən kəndlərin sakinləri bu şirin su hövzəsindəki çoxalan balıqlardan da istifadə ediblər.

İqtisadçı Mirzə Məmmədov deyir ki, alternativ suvarma mənbəyi olan anbarlara su ehtiyatı Xaçınçay, Tərtərçay və Yuxarı Qarabağ kanalından nasoslar vasitəsi ilə
vurulan su hesabına yığılıb. Bu sahəyə cavabdeh şəxslər bildirirlər ki, hazırkı vəziyyətdə həmin çaylar mənbələrini işğal altında olan ərazilərdən götürdüyündən ciddi problemlər mövcuddur. Çünki, ermənilər çaylara suyu buraxmır. Qış aylarında fasilələrlə buraxılan suyu isə göllərə yığmaq mümkün olmur. Kolxoz və sovxoz dövrlərindən fərqli
olaraq, kəndlilər növbəsiz və plansız əkin işləri apardığından artezian quyularından və Yuxarı Qarabağ kanalından nasoslarla vurulan su kifayət etmir.