Xəbərlər

Ədliyyə naziri Fikrət Məmmədov yanvarın 31-də İranın Azərbaycandakı səfiri Möhsün Pakayin ilə görüşmüşdür. 
Ədliyyə Nazirliyinin mətbuat xidmətindən bildirmişlər ki, F.Məmmədov Azərbaycan ilə İran arasındakı dostluq və səmərəli əməkdaşlığın dərin tarixi kökləri olduğunu vurğulamış, bu əlaqələrin inkişafında ulu öndərimizin müstəsna rolunu qeyd etmiş, ikitərəfli münasibətlərə dövlətimizin başçısı İlham Əliyevin xüsusi önəm verdiyini və prezidentlərin səfərlərinin qarşılıqlı fəaliyyətin dərinləşməsinə güclü təkan olduğunu bildirmişdir.
Ölkələrimizin zəngin müqavilə bazasına söykənən müxtəlif sahələrdə, o cümlədən hüquqi əlaqələri qeyd edilmiş, respublikamızda ədliyyə sistemində aparılan islahatlardan danışılaraq əməkdaşlığın əhəmiyyəti vurğulanmışdır.
Dövlətlərimiz arasında münasibətlərin inkişafında Azərbaycan xalqının ümummilli lideri Heydər Əliyevin böyük xidmətlərini məmnunluqla xatırladan səfir ölkəsinin Azərbaycan ilə əlaqələrin daha da genişləndirilməsinə xüsusi əhəmiyyət verdiyini vurğulamış, iki ölkənin ədliyyə və məhkəmə orqanları arasında qarşılıqlı fəaliyyətin yüksək səviyyədə olduğunu qeyd etmiş, hüquqi əməkdaşlığımızın daha da genişləndirilməsi üçün səylərini əsirgəməyəcəyini söyləmişdir. 
Görüşdə hüquqi yardım, məhkumların verilməsi və digər məsələlər ətrafında fikir mübadiləsi aparılmış, penitensiar müəssisələrdə tibbi yardımın təşkilinə dair Azərbaycanın təcrübəsinə maraq göstərilmişdir.