Xəbərlər

Fevralın 1-də Azərbaycan Milli İncəsənət Muzeyində Gənclər Gününə həsr edilmiş “Bir gəncin gözü ilə Kipr”adlı fotosərgi keçiriləcəkdir.
Azərbaycan Milli İncəsənət Muzeyindən  bildirmişlər ki, sərgidə hazırda Şimali Kiprin Doğu Akdeniz Universitetinin biznesin idarə edilməsi fakültəsində təhsil alan İsmayıl Mahmudovun fotoşəkilləri nümayiş olunacaqdır. 
Sərgi Azərbaycan – Kipr Dostluq Cəmiyyətinin təşəbbüsü ilə təşkil olunacaqdır. 
Ötən ildən il fəaliyyətə başlayan Azərbaycan-Kipr Dostluq Cəmiyyətinin əsas məqsədi Şimali Kiprdə yaşayan azərbaycanlılar və digər türkdilli xalqlar arasında əlaqələrin yaradılması və eyni zamanda, Azərbaycanın mədəniyyətini, folklorunu, milli adət-ənənələrini, tarixi abidələrini təbliğ etməkdən, ölkəmizin və Şimali Kiprin ali təhsil ocaqlarında təhsil alan gənclərin əməkdaşlığının genişləndirilməsinə yardım göstərməkdən ibarətdir. 
Belə gənclərdən biri olan İsmayıl Mahmudovun Şimali Kiprə aid çəkdiyi rəsmlər Cəmiyyət tərəfindən yüksək səviyyədə hazırlanaraq sərgi formasına salınmışdır.
İsmayıl Mahmudov 1994-cü il iyulun 16-da Gürcüstanın Marneuli şəhərində anadan olmuş, 2011-ci ildə Bakı şəhərinin Xətai rayonundakı 58 nömrəli orta məktəbi bitirmişdir. O, ötən il Doğu Akdeniz Universitetinə daxil olmuşdur. 
Azərbaycan-Kipr Dostluq Cəmiyyətinin ilk layihəsi olan “Bir gəncin gözü ilə Kipr” adlı sərginin bu il mayın 28-də Belçikada, iyun ayında Moskvada və Sankt-Peterburqda, iyulda isə Fransada keçirilməsi nəzərdə tutulmuşdur.