Xəbərlər

Gəncədə Əlil Təşkilatları İttifaqının (ƏTİ) "Əlilliyi olan insanların həyatında müsbət dəyişiklik" layihəsi çərçivəsində "Hamı üçün bərabər hüquqlar və bərabər imkanlar" mövzusunda konfrans keçirilib.

Əmək və Əhalinin Sosial Müdafiəsi Nazirliyinin İctimaiyyətlə əlaqələr şöbəsindən  verilən məlumata görə, hökumət və qeyri-hökumət təşkilatlarının nümayəndələrinin, əlilliyi olan şəxslərin iştirak etdiyi konfransda Əlil Təşkilatları İttifaqının prezidenti Davud Rəhimli, Əmək və Əhalinin Sosial Müdafiəsi Nazirliyinin Əlillərin sosial müdafiəsi siyasəti şöbəsinin sektor müdiri İsgəndər Müstafayev, "Dünyaya Baxış" beynəlxalq humanitar təşkilatının layihə rəhbəri Vüqar Əhmədov, Gəncə şəhər İcra Hakimiyyətinin nümayəndəsi Əsgər Babazadə, Ombudsman Aparatının Gəncə Regional Mərkəzinin baş məsləhətçisi Səbuhi Abbasov, QHT rəhbərləri Elmira İsmayılova, Həsən Hüseynli və başqaları çıxış ediblər.

Tədbirdə respublikada əlillərin sosial müdafiəsinin gücləndirilməsi istiqamətində dövlət tərəfindən görülən işlərdən söz açılmaqla, bu təbəqədən olan insanların maddi və mənəvi tələbatlarının ödənilməsi sahəsində uğurlu tədbirlərin həyata keçirildiyi vurğulanıb. Konfrans iştirakçıları ölkədə əlilliyin vəziyyəti, statistikası, əlilliyi olan insanların sosial problemləri və onların həlli yolları ilə bağlı müzakirələr aparıb, təkliflərini bildiriblər.

Məlumat üçün bildirək ki, "Dünyaya Baxış" beynəlxalq humanitar təşkilatının dəstəyi ilə icrasına başlanılan "Əlilliyi olan insanların həyatında müsbət dəyişiklik" layihəsinin məramı əlilliyi olan insanlar üçün sosial və hüquqi şəraitin yaxşılaşdırılmasıdır. İki il yarım müddətində həyata keçiriləcək layihə Əmək və Əhalinin Sosial Müdafiəsi Nazirliyi yanında fəaliyyət göstərən İctimai Şuradakı müvafiq işçi qrupu ilə birgə işlərin görülməsini, BMT-nin "Əlilliyi olan insanların hüquqları haqqında" Konvensiyasından irəli gələn hüquqi islahatların həyata keçirilməsinə töhfənin verilməsini, əlilliyi olan şəxslərlə bağlı ictimai görüşlərin, dəyirmi masaların və digər tədbirlərin təşkil olunmasını nəzərdə tutur.