Xəbərlər

Yaponiyanın hakim koalisiyası tərəfindən qəbul edilmiş yeni vergi proqramı varlılardan rüsumların, ticarətdən vergilərin artırılmasını və bu fonda daxili tələbatın, məşğulluğun və istehsalın stimullaşdırılmasını nəzərdə tutan paketi özündə birləşdirmişdir. Rəsmi mənbələrin bildirdiyinə görə, 2013-cü maliyyə ilində müxtəlif vergilərin və rüsumların 250 milyard yen (təqribən 2,8 milyard dollar) məbləğində azaldılması nəzərdə tutulur. Bu zaman yeni evin inşası və ya alınmasından, ipoteka kreditlərindən vergilər, həmçinin fond bazarında kiçik əməliyyat aparan fərdi investorlardan rüsumlar azaldılacaqdır.
Hakim koalisiya daha çox işçi cəlb edən və onlara yüksək əmək haqqı verən sahibkarlardan korporativ verginin azaldılmasını da planlaşdırır. Baba və nənələrin öz nəvələrinə təhsil almaq üçün verdikləri maliyyə yardımından vergilər də azaldılacaqdır.
Bütün bu tədbirlər ölkəni ticarətdən tutulacaq istehlak vergisinin artırılmasına hazırlamaq məqsədi daşıyır. Onun hazırda mövcud 5 faizdən 2014-cü ilin avqustunadək 8 faizə, 2015-ci ildə isə 10 faizə çatdırılması qərara alınmışdır. Yaponiya hökuməti illik mənfəəti 40 milyon yeni ( təqribən 440 min dollar) ötən varlı insanlardan gəlir vergisini də 40 faizdən 45 faizə qaldırmaq fikrindədir. Daha varlı insanlardan rüsumların 55 faizə çatdırılması nəzərdə tutulur.
Cari il ərzində təkmilləşdirilməsi nəzərdə tutulan bu tədbirlər Yaponiyaya ümumi daxili məhsulun həcmini artıq iki dəfə üstələyən nəhəng dövlət borcunu azaltmağa imkan verəcəkdir. Həmin tədbirlər deflyasiya və milli valyutanın yüksək kursunun iqtisadiyyatda yaratdığı durğunluğun aradan qaldırılmasına da kömək edəcəkdir.