Xəbərlər

 Azərbaycanın Liviyadakı səfirliyinin təşəbbüsü ilə bu ölkənin aparıcı kütləvi informasiya vasitələrində 20 Yanvar faciəsi ilə bağlı geniş məlumat yayılmışdır. 
Səfirlikdən bildirmişlər ki, “Libya” dövlət televiziya kanalının “Xəbərlər” proqramında 20 Yanvar faciəsi barədə məlumat verilmiş, həmin kanalda ərəb dilində “Qanlı Yanvara aparan yol” adlı sənədli filmi nümayiş etdirilmişdir. 
Eyni zamanda, “Libya” qəzetində “Azərbaycan xalqı 20 Yanvar faciəsini qeyd edir”, “Əl-Vatan əl-Libiyyə”, “Fəsəniyə” və “Brniq” qəzetlərində “Azərbaycanın Liviyadakı səfirliyi 20 Yanvar qətliamının və sovet rejimindən azad olmanın ildönümü ilə əlaqədar press-reliz yaymışdır” sərlövhəli məqalələr dərc edilmişdir.
İyirmi Yanvar faciəsinin 23-cü ildönümü ilə əlaqədar səfirliyin hazırladığı press-relizin yer aldığı məqalələrdə faciənin mahiyyətindən danışılmış, onun, eyni zamanda, Azərbaycan tarixinin ən şərəfli səhifələrindən biri olduğu qeyd edilmişdir. Həmçinin Azərbaycanın 1991-ci ildə müstəqilliyini bərpa etdiyi və dünya birliyinin layiqli üzvünə çevrildiyi vurğulanmışdır. 
Səfirlik yerli KİV-də 20 Yanvar faciəsi ilə bağlı məlumatların yayılması istiqamətində işini davam etdirir.