Xəbərlər

Azərbaycan Dövlət Gənc Tamaşaçılar Teatrı yeni başlanan ildə yaradıcılıq əməkdaşlığını genişləndirmək istiqamətində fəaliyyətini davam etdirir.
Teatrın mətbuat xidmətindən  bildirmişlər ki, qarşılıqlı yaradıcılıq mübadilələrinin həyata keçiləcəyi növbəti layihə Rusiya Federasiyasının Kalmık Respublikasında fəaliyyət göstərən B.Basanqov adına Milli Dram Teatrı ilə bağlıdır. 
Azərbaycan Dövlət Gənc Tamaşaçılar Teatrı ilə B.Basanqov adına Milli Dram Teatrının rəhbərlikləri arasında imzalanmış qarşılıqlı qastrol mübadiləsinə dair müqaviləyə əsasən, bu il martın 1-dən 3-dək B.Basanqov adına Milli Dram Teatrının yaradıcı kollektivi Azərbaycan Dövlət Gənc Tamaşaçılar Teatrının qonağı olacaqdır. 
Teatr uşaqlar üçün “Ağ ayın nağılı” (“Skazka beloqo mesyatsa”), böyüklər üçün isə italyan dramaturqu Karlo Qaldoninin “Mehmanxana sahibəsi” (“Traktirşitsa”) tamaşalarını nümayiş etdirəcəklər. 
Müəllifi və rejissoru Rusiya Federasiyası və Kalmık Respublikasının Əməkdar İncəsənət Xadimi Boris Manciyev olan “Ağ ayın nağılı” tamaşasının baletmeysteri Kalmık Respublikasının Əməkdar Mədəniyyət işçisi İrina Samsonova, bəstəkarı Kalmık Respublikasının Əməkdar İncəsənət xadimi Arkadi Manciyevdir. Tamaşa martın 1-dən 3-dək saat 12.00 və 15.00-da nümayiş etdiriləcəkdir. 
Martın 2 və 3-də nümayiş etdiriləcək ikihissəli “Mehmanxana sahibəsi” komediyasının rejissoru Kalmık Respublikasının Əməkdar İncəsənət Xadimi Sergey Burlaçenko, rəssamı Yelena Varova, plastika üzrə rejissoru Kalmık Respublikasının Əməkdar Mədəniyyət İşçisi İrina Samsonovadır. 
Bu ilin noyabrında isə Azərbaycan Dövlət Gənc Tamaşaçılar Teatrı iki tamaşa ilə Kalmık Respublikasına qastrol səfərinə yola düşəcəkdir.