Xəbərlər

 Yanvarın 18-də Azərbaycan Respublikasının Türkmənistandakı səfirliyində Qanlı Yanvar faciəsinin 23-cü ildönümü ilə əlaqədar anma mərasimi keçirilmişdir. 

Tədbirdə Türkmənistanda yaşayan həmvətənlərimiz, ictimai və yaradıcılıq birliklərinin üzvləri, ziyalılar, iş adamları, səfirliyin əməkdaşları iştirak etmişdir.

Anma mərasiminin əvvəlində vətənimizin müstəqilliyi uğrunda canlarından keçmiş şəhidlərimizin xatirəsi bir dəqiqəlik sükutla yad edilmişdir.

Səfir Vəhdət Sultanzadə mərasimdə çıxış edərək, xalqımızın azadlıq mübarizəsi tarixi, müstəqillik yolundakı çətinliklərindən danışmış, sovet ordusu tərəfindən dinc sakinlərə qarşı törədilmiş bu qanlı qırğın barədə məlumat vermişdir. 

Ulu öndər ümummilli lider Heydər Əliyevin hakimiyyətə qayıdışından sonra bu qanlı faciəyə hüquqi-siyasi qiymət verildiyini vurğulayan diplomat, 20 Yanvar şəhidlərinin xatirəsinin hər bir azərbaycanlının qəlbində daim yaşayacağını və yaddaşlardan heç vaxt silinməyəcəyini qeyd etmişdir.

Azərbaycan Respublikasının Prezidenti İlham Əliyev tərəfindən 20 Yanvar şəhidlərinin ailələri üçün müvafiq təqaüdlərin ayrılmasından, onlara xüsusi qayğı və diqqət göstərməsindən söhbət açmışdır. 

Tədbirdə çıxış edənlər Qanlı Yanvar faciəsi qurbanlarının xatirəsinin unudulmadığını, Azərbaycanın müstəqilliyi, dövlətçiliyimizin bərpası uğrunda mübarizədə həlak olmuş şəhidlərimizin misilsiz qəhrəmanlıqlarının heç vaxt unudulmayacağını vurğulamışlar. 

Tədbirdə xalqımıza qarşı davam edən erməni təcavüzündən və 20 Yanvar faciəsindən bəhs olunan “Azadlığa gedən yol” adlı sənədli film nümayiş olunmuşdu