Xəbərlər

Yanvarın 18-də Azərbaycan Respublikasının Prezidenti yanında Dövlət İdarəçilik Akademiyasında (DİA) 20 Yanvar faciəsinin 23-cü ildönümü ilə bağlı anma mərasimi keçirilmişdir.

DİA-dan  bildirmişlər ki, əvvəlcə Azərbaycanın azadlığı və suverenliyi uğrunda mübarizədə canlarından keçmiş qəhrəman Vətən övladlarının xatirəsi bir dəqiqəlik sükutla yad edilmiş və faciəni əks etdirən videofilm nümayiş etdirilmişdir.

Tədbiri açan DİA-nın rektoru, akademik Urxan Ələkbərov 1990-cı ilin Qanlı Yanvar günlərini xatırlatmış, sovet imperiyasının törətdiyi bu cinayət aksiyasını xalqımızın milli azadlıq hərəkatını boğmağa, ərazi bütövlüyümüzün qorunması naminə haqq səsimizi susdurmağa çalışan siyasətin acı nəticəsi kimi qiymətləndirmişdir. Bildirilmişdir ki, bu faciə heç bir zaman unudulmayacaq və günahsız insanların əziz xatirəsi daim xalqımızın qəlbində yaşayacaqdır. 

U.Ələkbərov vurğulamışdır ki, ümummilli lider Heydər Əliyev öz haqq səsini ucaldaraq 20 Yanvar faciəsinin dünya ictimaiyyətinə çatdırılması istiqamətində mühüm səylər göstərmişdir. Ulu öndərin Azərbaycanın Moskvadakı daimi nümayəndəliyinə gələrək keçirdiyi mətbuat konfransının əhəmiyyətindən, şəhidlərin xatirəsinin əbədiləşdirilməsi istiqamətində dövlətin gördüyü işlərdən danışan akademik qeyd etmişdir ki, ümummilli lider Heydər Əliyevin təşəbbüsü ilə bu hadisəyə ilk dəfə olaraq hüquqi-siyasi qiymət verilmişdir. 

Tədbirdə çıxış edən akademiyanın dosentləri M.Quluzadə, F.Əhmədov, M.İsgəndərzadə və digər çıxış edənlər zaman keçdikcə tariximizin həm qəhrəmanlıq, həm də faciəli səhifələrinin yad edilməsinin, gələcək nəsillərə çatdırılmasının vacibliyini vurğulamışlar. 

Sonda akademiyanın tələbələrinin hazırladıqları ədəbi-bədii kompozisiya nümayiş etdirilmişdir.