Xəbərlər

Yanvarın 18-də Azərbaycan Respublikası Dövlət Dəniz Administrasiyasında (ARDDA) 20 Yanvar faciəsinin 23-cü ildönümünə həsr olunmuş tədbir keçirilmişdir.

 tədbir iştirakçıları əvvəlcə 1990-cı il yanvarın 20-də şəhid olmuş oğul və qızlarımızın əziz xatirəsini bir dəqiqəlik sükutla yad etmişlər.

Sonra çıxış edən ARDDA-nın rəisi Qüdrət Qurbanov demişdir ki, 20 Yanvar faciəsi Azərbaycan xalqının qan yaddaşına əbədi həkk olunmuşdur. Bu faciə M.Qorbaçov başda olmaqla, o vaxtkı ermənipərəst SSRİ rəhbərliyinin Azərbaycan xalqının haqq səsinin susdurulması üçün planlı şəkildə törətdiyi qanlı cinayət idi. Sovetlər İttifaqının müdafiə naziri D.Yazovun, daxili işlər naziri V.Bakatinin, digər əlaqədar struktur rəhbərlərinin başçılığı ilə təpədən-dırnağadək silahlanmış və tərkibində ermənilərin də olduğu peşəkar zabitlər əliyalın xalqımıza amansız divan tutmuşlar.

M.Qorbaçov SSRİ və Azərbaycan Respublikasının konstitusiyalarının tələblərini kobud şəkildə pozaraq, yanvarın 19-da Bakıya qoşun yeridilməsi barədə göstəriş vermiş və yanvarın 20-də fövqəladə vəziyyət elan etmişdi. Dövlət Təhlükəsizliyi Komitəsi isə bundan əvvəl, yanvarın 19-u saat 19.30 radələrində o vaxt yeganə televiziya olan AzTV-nin enerji blokunu partladaraq televiziya verilişlərini dayandırmışdı. Məqsəd xalqı əsas informasiya mənbələrindən məhrum etmək idi.

Amansız qırğın nəticəsində 147 nəfər öldürülmüş, yüzlərlə insan yaralanmış və qanunsuz həbs edilmişdir. Həlak olanlar arasında qadınlar, uşaqlar, qoca və ahıllarla yanaşı, həkim və tibb işçiləri də olmuşdur. Q.Qurbanov bildirmişdir ki, belə bir ağır şəraitdə ümummilli lider Heydər Əliyev özünün və yaxınlarının həyatını təhlükədə qoyaraq, Azərbaycanın Moskvadakı daimi nümayəndəliyinə gəlmiş, SSRİ rəhbərliyinin, M.Qorbaçovun Azərbaycan xalqına qarşı törətdiyi cinayəti kəskin şəkildə tənqid etmişdi. Qanlı 20 Yanvar faciəsinə də hüquqi-siyasi qiymət yalnız ümummilli liderimiz Heydər Əliyevin yenidən respublika rəhbərliyinə qayıdışından sonra verilmişdir.

Dövlət Dəniz Administrasiyası rəisinin müavini Şahlar Məmmədov, şöbə müdirləri Şəmistan Həsənov, Fuad Mərdiyev və başqaları tədbirdə çıxış edərək, Qanlı Yanvar faciəsi ilə bağlı acı xatirələrini paylaşmış, o vaxtkı respublika rəhbərliyinin xalqa zidd siyasətini, öz xalqının taleyinə biganəliyini pisləmiş, şəhidlərimizə Allahdan rəhmət diləmişlər.