Xəbərlər

Göygöl Mənbəyini Kiçik Qafqaz sıra dağlarından götürən Gəncə çayının bundan sonra yazda və payızda daşma təhlükəsi olmayacaqdır. 1950-ci illərdə inşa olunan, lakin son zamanlar baxımsızlıqdan bərbad vəziyyətə düşən çayın baş qurğusunda aparılan təmir-bərpa işləri artıq başa çatmaq üzrədir.

Göygöl Suvarma Sistemləri İdarəsindən bildirmişlər ki, son illər ölkə ərazisində daşqınların artması yaşayış massivlərini, eləcə də əkin sahələrini təhlükə ilə üz-üzə qoymuşdur. Dağ çaylarında mövsümi xarakter daşıyan bu hal Gəncə çayında özünü daha qabarıq göstərir. 

Bu məqsədlə keçən il Dövlət İnvestisiya Fondunun maliyyə dəstəyi ilə Gəncə çayının Göygöl rayonu ərazisində yerləşən baş qurğunun əsaslı şəkildə təmirinə başlanılmış və qısa vaxt ərzində təmir-bərpa işləri başa çatdırılmışdır. Artıq qurğu çaydakı daşqınları tənzimləməklə yanaşı, onun suyunu iki hissəyə bölərək Göygöl və Samux rayonlarının, eləcə də Gəncənin əkin sahələrinin suvarılması üçün Xan və Ərəbli kanallarına axıdılmasına imkan yaradacaqdır.