Xəbərlər

Sloveniya Respublikasının baş nazirinin müavini, iqtisadi inkişaf və texnologiya naziri Radovan Zerjav Azərbaycana səfəri çərçivəsində AzMeCo şirkətinə məxsus metanol zavoduna səfər etmişdir. 

 qonaqların zavoda səfəri metanol kompleksi ilə tanışlıqdan başlamışdır. AzMeCo metanol zavodunda görülən işlərlə tanış olan cənab Radovan Zerjav kompleksin müxtəlif sahələrində və ən son texnologiya ilə təchiz edilmiş idarəetmə otağında olmuşdur. Qonaq metanol zavodu kimi mürəkkəb bir kompleksin Azərbaycanda yerli şirkət tərəfindən uğurla inşa olunmasından heyrətləndiyini ifadə etmişdir. Qeyd etmək lazımdır ki, R.Zerjav 1981-ci ildə Sloveniyada tikilən metanol zavodunun rəhbəri vəzifəsində çalışmışdır.

Baş nazirin müavini metanol zavodunun Azərbaycan iqtisadiyyatı üçün mühüm bir layihə olduğunu qeyd etmiş və ölkənin davamlı iqtisadi inkişafına öz töhfəsini verəcəyindən əmin olduğunu bildirmişdir. O, gələcəyin alternativ enerji mənbəyi hesab olunan metanolun məişətdə istifadə etdiyimiz demək olar ki bütün əşyaların tərkibində olduğunu vurğulamışdır. 

Daha sonra sloveniyalı qonaqlarla AzMeCo şirkətinin rəhbərliyi arasında işgüzar görüş keçirilmiş və qarşılıqlı əməkdaşlıq imkanları müzakirə edilmişdir.