Xəbərlər

Lənkəran Rayon Mərkəzi Kitabxanasında “Azərbaycan Respublikasının Dövlət gerbi haqqında” Azərbaycan Respublikası Konstitusiya Qanununun qəbul edilməsinin 20 illiyinə həsr olunmuş tədbir keçirilmişdir.

toplantıda çıxış edən kitabxananın şöbə müdiri Xədicə Məmmədova əlamətdar günün tarixi barədə məruzə etmişdir.

Qeyd olunmuşdur ki, Azərbaycan Xalq Cümhuriyyəti hökuməti Azərbaycanın Dövlət gerbi haqqında 1920-ci il yanvarın 30-da müsabiqə elan etmiş və müsabiqədən keçəcək gerb nümunəsinin həmin ilin mayın 28-də qəbul ediləcəyi haqqında qərar çıxarmışdır. 

Lakin 1920-ci il aprel ayının 28-də Azərbaycan Xalq Cümhuriyyətinin süqut etməsi nəticəsində gerb qəbul edilməmişdir. 

1990-cı il noyabrın 17-də Naxçıvan Muxtar Respublikasının Ali Məclisi Dövlət gerbi ilə bağlı məsələni müzakirə edərək, Azərbaycan SSR Ali Soveti qarşısında Azərbaycanın Dövlət gerbinin hazırlanması üçün yeni müsabiqənin elan olunması haqqında vəsatət qaldırmışdır. 

Müsabiqə 1991-ci il fevralın 5-də Azərbaycan Respublikası Ali Sovetinin qərarı ilə elan olunmuşdur. 

1991-1992-ci illər ərzində müsabiqəyə Dövlət gerbinin onlarla layihəsi təqdim olunmuşdur. Müzakirələr zamanı 1919-1920-ci illərdə hazırlanmış layihələrdən birinin qəbul edilməsi ilə bağlı təkliflər də səslənmişdir. Azərbaycan Respublikasının Ali Soveti 1993-cü il yanvarın 19-da qəbul etdiyi Konstitusiya Qanunu ilə 1919-1920-ci illərdə hazırlanmış Dövlət gerbi layihələrindən birini müəyyən dəyişikliklərlə Azərbaycan Respublikasının Dövlət gerbi kimi təsdiq etmişdir. Azərbaycan Respublikasının Dövlət gerbi Azərbaycan dövlətinin müstəqilliyi rəmzidir. 

Dövlət gerbi palıd budaqlarından və sünbüllərdən ibarət qövsün üzərində yerləşən Şərq qalxanının təsvirindən ibarətdir. 

Qalxanın üstündə Azərbaycan Respublikasının Dövlət bayrağının rəngləri fonunda səkkizguşəli ulduz, ulduzun mərkəzində alov təsviri vardır. 

Tədbirin iştirakçıları “Azərbaycan Respublikasının Dövlət gerbi haqqında” Azərbaycan Respublikası Konstitusiya Qanununun qəbul olunmasının 20 illiyi ilə bağlı təşkil olunmuş kitab sərgisi ilə tanış olmuşlar.