Xəbərlər

Yanvarın 16-da voleybolçu qadınlar arasında Çempionlar Liqası yarışlarının pley-off mərhələsinin ilk oyunları keçirilmişdir.

 Azərbaycanı bu turnirdə təmsil edən “Azərreyl” və “Lokomotiv” komandaları növbəti matçlarına çıxmışlar. Püşkatmanın nəticəsi təmsilçilərimizi bir-biri ilə üz-üzə qoymuşdur. 

“Azərreyl” komandası Azərbaycan Voleybol Mərkəzində “Lokomotiv”i “qəbul etmişdir.

Qarşılıqlı hücumlar şəraitində keçən ilk hissədə “Lokomotiv” birinci texniki fasiləyə 8:7 hesablı üstünlüklə çıxmışdır. Sonradan təşəbbüsü ələ alan “Azərreyl” komandası ikinci texniki fasiləyə 16:13 hesabı ilə ayrılmışdır. “Azərreyl”in voleybolçusu Meqan Hocun ardıcıl zərbələri qarşısında aciz qalan “Lokomotiv” ilk hissədə 20:25 hesabı ilə məğlub olmuşdur.

İkinci setə fəal başlayan “Azərreyl” ilk texniki fasiləni öz xeyrinə başa vurmuşdur – 8:4. Bu hissədə “Lokomotiv” blokda inamlı təsir bağışlasa da, Megan Hocun inamlı oyun nümayiş etdirməsi nəticəsində set 25:21 hesabı ilə “Azərreyl”in xeyrinə başa çatmışdır. 

Maraqlı idman mübarizəsi şəraitində keçən üçüncü setdə “Azərreyl” komandasının voleybolçusu Sara Anzanella əzmkar oyunu ilə yadda qalmışdır. Bu hissədə də “Azərreyl” rəqibindən üstün olmuşdur – 25:22.

Beləliklə, “Azərreyl” komandası “Lokomotiv”i 3:0 hesabı ilə məğlub etmişdir. Görüşdə “Azərreyl”in idmançısı Megan Hoc 23, “Lokomotiv” komandasının voleybolçusu Aneta Havleçkova isə 17 xal toplamışlar.

Komandalar arasında cavab oyunu bir həftədən sonra Azərbaycan Voleybol Mərkəzində keçiriləcəkdir.