Xəbərlər

Baş qərargahı Amsterdamda yerləşən Benilüks Azərbaycanlıları Konqresinin (BAK) mətbuat xidmətindən bildirmişlər ki, qurum 1990-cı il yanvarın 20-də Bakıda törədilmiş Qanlı Yanvar hadisələrinin 23-cü ildönümü ilə bağlı silsilə tədbirlərini davam etdirir.

BAK-ın ən böyük təşkilatlarından biri olan Azərbaycan-Hollandiya Həmrəylik Cəmiyyətinin Rotterdamdakı ofisində yanvarın 20-də Qanlı Yanvar faciəsi ilə bağlı anma mərasimi keçiriləcəkdir.

Tədbirdə Hollandiya ictimaiyyətinin nümayəndələri, Azərbaycanın Haaqadakı səfirliyinin diplomatları, türk, yəhudi və digər diaspor təşkilatlarının təmsilçiləri, siyasi partiyaların üzvləri iştirak edəcəklər.

Mərasimdə 20 Yanvardan bəhs edən sənədli film nümayiş etdiriləcək, bu qanlı hadisələrin şahidləri isə xatirələrini bölüşəcəklər.