Xəbərlər

 Beynəlxalq Futbol Assosiasiyaları Federasiyasının (FİFA) prezidenti Yozef Blatter azarkeşləri irqçilikdə təqsirləndirilən komandaların xallarının ləğvi ilə cəzalandırmağı təklif edir.

“Deyəsən, biz futbolda irqçiliyin kökünü birdəfəlik kəsməyə heç vaxt nail ola bilməyəcəyik. Biz artıq buna cəhd etmişik, İngiltərə nəzarət sistemi olan müasir stadionların tikilməsi, eləcə də azarkeşlər üçün maarifləndirici proqramların təşkili ilə futbolda zorakılıqla mübarizə sahəsində çox yaxşı nümunə göstərmişdir. Zənnimcə, problemin daha radikal həlli xalların ləğv edilməsi olacaqdır. Bu, istənilən digər tədbirdən daha səmərəli olacaqdır”. Blatter bu fikri “Sky Sports”a müsahibəsində bildirmişdir. 

FİFA-nın prezidenti bu yaxınlarda “Milan” və “Pro Patriya” arasında keçirilmiş yoldaşlıq oyununu da xatırlatmışdır. Dördüncü İtaliya liqası klubundan olan azarkeşlərin yarımmüdafiəçi Kevin-Prins Boatenqin ünvanına irqçi çağırışlarına görə “rossoner”lərin meydanı tərk etməsindən sonra həmin oyun yarımçıq qalmışdı. 

Blatter qeyd etmişdir ki, komanda artıq tamaşaçısız oyun keçirmişdir və bu, bütün azarkeşlər üçün xəbərdarlıq olmalıdır. Boatenq baş verənlərə diqqət göstərilməsini tələb etməklə doğru hərəkət etmişdir. Lakin bu, problemin həlli ola bilməz. Heç bir problemi ondan qaçmaqla həll etmək mümkün deyildir. Nə şəxsi həyatdakı, nə də iqtisadiyyatdakı problemləri.