Xəbərlər

Yanvarın 14-də Azərbaycanın Los-Ancelesdəki baş konsulu Nəsimi Ağayev Kaliforniyanın ən ali qanunverici orqanı olan Kaliforniya Senatının plenar sessiyasında çıxış etmişdir. Bu münasibətlə, Kaliforniya Senatının plenar iclas zalında Azərbaycanın dövlət bayrağı dalğalandırılmışdır. 

Senatın respublikaçılar fraksiyasının rəhbəri Bob Haff çıxış edərək əvvəlcə N.Ağayevi senatorlara təqdim etmişdir. B.Haff Azərbaycanın ABŞ-ın güclü müttəfiqi olduğunu və Kaliforniya ilə möhkəm münasibətlərin qurulması istiqamətində mühüm səylər göstərdiyini vurğulamışdır. 

Sonra N.Ağayev çıxış edərək Azərbaycan xalqının müstəqillik uğrunda apardığı mübarizədən, Azərbaycanın müstəqil dövlət kimi əldə etdiyi nailiyyətlərdən, regionda oynadığı mühüm rolundan danışmışdır. Baş konsul Azərbaycanda müxtəlif dinlərin və xalqların dinc və sülh şəraitində yaşayıb inkişaf etdiyi cəmiyyətin qurulduğunu vurğulamışdır. 

Azərbaycan-ABŞ strateji tərəfdaşlıq münasibətlərinə toxunan N.Ağayev hər iki ölkənin ümumi dəyərləri, maraqları və gələcəyə baxışları bölüşdüyünü bildirmiş, Xəzər hövzəsi kimi önəmli bir bölgədə ölkəmizin Birləşmiş Ştatların etibarlı və mühüm tərəfdaşı olduğunu qeyd etmişdir. 

Sonda N.Ağayev Azərbaycanın Kaliforniya ilə bütün sahələrdə münasibətləri inkişaf etdirmək niyyətində olduğunu bildirmişdir. Baş konsul bu istiqamətdə ştatın senatorları ilə əməkdaşlıq etməyə hazır olduğunu diqqətə çatdırmışdır. 

Tədbir çərçivəsində N.Ağayev, həmçinin Kaliforniya Senatının sədri Darrell Staynberq ilə görüşmüşdür.