Xəbərlər

 Nüfuzlu “NewEurope Online” analitik resursu Amerika Birləşmiş Ştatlarının Prezidenti Barak Obamanın bu yaxınlarda Azərbaycan Respublikasının Prezidenti İlham Əliyevə göndərdiyi təşəkkür məktubu ilə bağlı informasiya yerləşdirmişdir. 

 informasiyada Prezident Barak Obamanın məktubunda yer almış fikirlər şərh edilmişdir. Müəllif ABŞ Prezidentinin “Əminəm ki, birgə səylərimiz nəticəsində dünyanın bir çox yerində üzləşdiyimiz çağırışların öhdəsindən uğurla gələcəyik” fikrinə xüsusi olaraq diqqəti cəlb etmişdir. 

Azərbaycan-ABŞ münasibətləri haqqında yazan müəllif iki ölkə arasında əlaqələrin inkişaf etdiyini bildirmişdir. İnformasiyada ABŞ-ın Azərbaycandakı səfirliyinə istinadən qeyd edilmişdir ki, Azərbaycandan Birləşmiş Ştatlara səfər edənlərin sayı artmışdır. Təkcə 2012-ci ildə ABŞ-a səfər etmək üçün Azərbaycan vətəndaşlarına 5 min 600 viza verilmişdir. Diqqətə çatdırılmışdır ki, Azərbaycan vətəndaşları əsasən Vaşinqtona, Nyu-Yorka və Texasa səfər edirlər. 

Yazıda dünyanın ən böyük demokratik ölkəsi və iqtisadi gücü olan ABŞ ilə Azərbaycan arasında iqtisadi və hərbi sahələrdə əməkdaşlığın uğurla inkişaf etdiyi bildirilmişdir. 

Müəllif informasiyanın hazırlanması zamanı AzərTAc-ın saytına da istinad etdiyini diqqətə çatdırmışdır.