Xəbərlər

Qazaxıstanın paytaxtı Astana şəhərini ortadan kəsən İşim çayının sol sahilində tikiləcək dairəvi binaların üstündən “çətir” çəkilməsi məsələsi geniş müzakirə olunur.

Qazaxıstan Prezidenti Nursultan Nazarbayev bu məsələ ilə bağlı demişdir ki, mən “çətir” altında şəhər yaratmaq istəyirəm. Dövlət başçısının sözlərinə görə, Astanada keçiriləcək “EKSPO-2017” Beynəlxalq sərgisinin pavilyonları çoxmərtəbəli yaşayış binaların içərisində olacaq və elə salınacaq ki, sərgi başa çatdıqdan sonra bu binalar əhalinin istifadəsinə verilə bilsin.

Prezident demişdir: ”İnsanlar yayda və qışda çətir altında olan bu şəhərdə gözəl şəraitdə yaşaya biləcəklər. Binalar “dairə” formasında tikiləcəkdir. Bu dairədə məktəb, xəstəxana, teatr, mağaza, restoran, kafe, bərbərxana və digər obyektlər olacaqdır. Uşaqlar palto geymədən 30 dərəcə şaxtada məktəbə gedə biləcəklər. Bu “dairə”lər sonra digər “dairə”lərlə birləşəcək, nəticədə 10-15 min əhalisi olan bir şəhər salınacaqdır.

Bu ideyanın müəllifi Qazaxıstandan olan arxitektor Yevgeni Neveliçkovdur.

Layihə çərçivəsində 30 məktəb, 50 uşaq bağçasının tikilməsi nəzərdə tutulur və bu bunların bir hissəsinin inşası artıq başlanmışdır.