Xəbərlər

Yanvarın 12-də Yaponiyanın Baş naziri Şinzo Abe Miyaqi prefekturasının sunamidən zərər çəkmiş İsinomaki şəhərində olmuşdur. Bu, Ş.Abenin Baş nazir seçildikdən sonra Tohoku regionuna ikinci səfəridir. Ötən ilin dekabrında o Fukusima prefekturasında olmuşdu. 

İsinomaki şəhərində Baş nazir Tohoku regionunda ən böyük müəssisələrdən biri hesab edilən gəmiqayırma zavoduna baş çəkmişdir. Bu müəssisə 2011-ci ilin martında baş vermiş sunami zamanı ciddi ziyan çəkmişdir. Baş nazirə müəssisədə aparılan bərpa işləri barədə məlumat verilmişdir. Bildirilmişdir ki, sabit iş yerlərinin yaradılması regionun bərpası üçün mühüm əhəmiyyətə malikdir. Müəssisənin rəhbərliyi bununla əlaqədar maliyyə yardımı göstərilməsini xahiş etmişdir.

Baş nazir bildirmişdir ki, təxirə salınmaz vəzifələri, o cümlədən yeni iş yerlərinin yaradılması ilə bağlı məsələləri sürətlə həll etmək məqsədi ilə Bərpa İşləri üzrə İdarənin səlahiyyətlərini genişləndirəcəkdir.