Xəbərlər

Azərbaycanın paytaxtı Bakı 2015-ci ildə keçiriləcək birinci Avropa Olimpiya Oyunlarına ev sahibliyi edəcəkdir. Bunu nəzərə alaraq əsas güc bu mötəbər yarışın yüksək səviyyədə təşkil olunmasına yönəldilmişdir.
Bu sözləri ERtv-yə müsahibəsində Bakı Şəhər Gənclər və İdman Baş İdarəsinin rəisi, Milli Olimpiya Komitəsinin üzvü Raqif Abbasov demişdir. 
Bildirmişdir ki, hazırda bəzi əcnəbi informasiya saytlarında Bakının 2024-cü il Yay Olimpiya Oyunlarına ev sahibliyi etmək üçün namizədliyini irəli sürməsi haqqında yazılar yerləşdirilir. Bu barədə danışmaq hələ tezdir. Çünki 2020-ci il Yay Olimpiya Oyunlarına ev sahibliyi edəcək ölkənin adı cari ilin payızında açıqlanacaqdır. 
R.Abbasov qeyd etmişdir ki, Bakı birinci Avropa Olimpiya Oyunlarını yüksək səviyyədə təşkil etdikdən sonra paytaxtımızın irihəcmli yarışlara, xüsusilə Yay Olimpiya Oyunlarına ev sahibliyi etmək üçün şansları artacaqdır. Təbii ki, Bakının 2024-cü il Yay Olimpiya Oyunlarına ev sahibliyi etmək üçün namizədliyini irəli sürməsi haqqında qərar da Milli Olimpiya Komitəsinin prezidenti tərəfindən qəbul olunur.