Xəbərlər

Azərbaycanda NATO standartlarına cavab verən 7.62x51 çaplı yeni snayper tüfəngi yaradılıb.

ERtv.Az-ın verdiyi xəbərə görə, bunu jurnalistlərə açıqlamasında müdafiə sənayesi naziri Yavər Camalov deyib.

Onun sözlərinə görə, tüfəngin atış məsafəsi 1000 metr, maqazin tutumu 10 güllə, çəkisi isə 7,1 kiloqramdır.

Bundan əlavə “Yalquzaq” adı ilə yeni pulemyot istehsal olunduğunu da deyən nazirin sözlərinə görə, bu pulemyot əsasən kəşfiyyat və xüsusi təyinatlıların aktiv döyüş aparması üçün nəzərdə tutulub.

Pulemyotun atış məsafəsi 380 metr, çəkisi 7 kiloqram, uzunluğu isə 1080 mm-dir.

Y.Camalov qeyd edib ki, bundan əlavə 14.5 snayper tüfənginin təkmilləşdirilməsi istiqamətində müəyyən işlər görülüb:

“Apardığımız təkmilləşdirmə işləri sayəsində snayperin tüfənginin çəkisi 35 kq-dan 28 kq-a endirilib və bir sıra texniki dəyişiklər aparılıb”.

Y.Camalov həmçinin qeyd edib ki, yerli müəssisələrdə dağlıq ərazilərdə döyüş aparmaq üçün çantada daşınan bir lüləli, iki lüləli və üç lüləli reaktiv qurğular hazırlanıb.

Nazir yeni 60 və 82 mm-lik uzaq məsafəli minaatanların yaradıldığını da diqqətə çatdırıb:

“Əgər 60 mm-lik minaatan ilə biz 1600 metr məsafədə hədəfi məhv edirdiksə, indi artıq 4 min metrə qədər məsafədə hədəfi məhv etmək mümkündür. Eləcə də 82 mm-lik minaatan ilə hədəf 2500-də məhv edilirdisə, indi 5 min metr məsafədə hədəfləri məhv etmək qabiliyyətinə malik olan qurğu yaradılıb”.