Xəbərlər

İtaliyanın “İnter” klubu ilə Avroliqanın qrup mərhələsinin son oyununda Azərbaycan çempionu “Neftçi” layiqli oyun göstərib heç-heçəyə nail ola bildi.

ERtv.Az xəbər verir ki, bütün oyunu güclü rəqiblə başabaş oynayan  “Neftçi” sonda 2:2-lik nəticə əldə edə bildi.

Halbuki görüş bakılılar üçün heç də yaxşı başlamadı. Artıq 9-cu dəqiqədə müdafiəmizdə kobud səhvdən sonra italyanlar Livayanın qolu ilə hesabda irəli çıxdılar.

İkinci hissədə, oyunun 52-ci dəqiqəsinə Rəşad Sadiqovun uzaq məsafədən vurduğu möhtəşəm qol meydan sahiblərini şoka saldı.

Lakin sevincimiz uzun çəkmədi. Artıq 2 dəqiqədən sonra, yenə də müdafiədə kobud səhvin nəticəsində Livaya daha bir qola imza atdı.  

Sevindirici haldır ki, “Neftçi” ruhdan düşməyib, fəal oynadı və bir neçə dəfə qol vurmaq imkanı oldu.
Hesab isə oyunun 89-cu dəqiqəsində bərabərləşdi. Bertuççi keçid edib, gözəl zərbə vurdu. Qapıçının geri qaytardığı topu, Kanales başla zərbə ilə qapıdan keçirdi.

Beləliklə ilk dəfə oynadığı Avropa Liqasının qrup mərhələsində “Neftçi” 3 xal toplaya bildi.