Xəbərlər

Polşa Azərbaycanın Ümumdünya Ticarət Təşkilatına (ÜTT) qəbul olmasına dəstək olacaq.

ERtv.Az-ın Polşaya ezam olunmuş müxbirinin verdiyi xəbərə görə, bu barədə Polşanın iqtisadiyyat nazirinin müavini Andjey Dixa jurnalistlərə deyib.

Nazir müavini qeyd edib ki, ÜTT-yə üzv olmaq Azərbaycanın ikitərəfli əlaqələrinin inkişafına mühüm təsir edəcək.

Onun sözlərinə görə, hazırda Azərbaycanla Polşa arasında illik ticarət dövriyyəsi azdır. Lakin o bildirib ki, cari ilin səkkiz ayında dövriyyədə artım müşahidə edilib.

“Azərbaycanla Polşa arasında ticarət balanslaşdırılmayıb. Belə ki, dövriyyənin əsasını Polşadan ixrac təşkil edir. ÜTT-yə üzv qəbul olmaq Azərbaycanın ticarətinin balanslaşdırılmasına da öz müsbət təsirini göstərəcək”.

Ölkələr arasında siyasi-iqtisadi əlaqələri müsbət, yaxşı qiymətləndirən Andjey Dixa qarşılıqlı investisiya qoyuluşu sahəsində hələ çox iş görülməli olduğunu deyib. O qeyd edib ki, hazırda Polşanın ixracının 80 faizi Avropa İttifaqına həyata keçirilir ki, bunun da səbəblərindən biri bu sahədə gömrük baryerlərinin olmamasıdır.