Xəbərlər

Bu gün Liviyanın baş naziri Bağdadi əl-Mahmudi məhkəmə qarşısına çıxacaq.

ERtv.Az-ın Vesti.ru-ya istinadən verdiyi xəbərə görə, baş prokurorluğun təmsilçisi Taha Baara bildirib ki, o, milli təhlükəsizliyə hədə yaradan cinayət törətməkdə şübhəli bilinir.

2006-cı ilin əvvəlindən 2011-ci ilin fevralına, inqilab başlayana qədər keçmiş Cəmahiriyyə hökumətinə rəhbərlik edən Bağdadi əl-Mahmudi, Müəmmar Qəddafi rejimi çökdüyü zaman Tunisə qaçıb.

Orada isə sərhədi qanunsuz keçdiyinə görə saxlanılaraq 6 aylıq həbsə məhkum olunub, lakin tezliklə azadlığa buraxılıbdır. 2012-ci ilin iyun ayının sonunda keçmiş baş nazir Liviyaya ekstradisiya olunub. Tunisdə əl-Mahmudinin göndərilməsi məsələsi ətrafında fikir ayrılıqları yaranıb.

Belə ki, prezident Moncef Marzouki qərarın ölkə başçısı ilə məsləhətləşmədən birtərəfli qaydada verilməsini səbəb gətirərək, bu qərarı qeyri-qanunu adlandırıb. O qeyd edib ki, baş nazir Hamadi Jebali bu addımı atmaqla öz səlahiyyətlərini aşıb.

Qeyd edək ki, əl-Mahmudi Liviya hökumətinin bütün sirlərini bilən yeganə şəxs olduğunu iddia edir. Bu səbəbdən, məhkəmə prosesinin yeni Liviya üçün presedentsiz olacağı hesab olunur.