Xəbərlər

Prezident İlham Əliyev Azərbaycan və Belarus arasında 2012-ci il avqustun 28-də Minsk şəhərində imzalanmış sazişlərin, Azərbaycan və Tacikistan arasında 2012-ci il iyulun 12-də Bakı şəhərində imzalanmış sənədlərin və Azərbaycan və Çin Xalq Respublikası arasında 2012-ci il iyunun 12-də Pekin şəhərində imzalanmış sənədlərin təsdiq edilməsi haqqında müvafiq fərmanlar imzalayıb.

Nazirlər Kabinetinə bu fərmanlarda göstərilən sənədlərin müddəalarının həyata keçirilməsi üçün zəruri tədbirlər görmək, Xarici İşlər Nazirliyinə həmin sənədlərin qüvvəyə minməsi üçün zəruri olan dövlətdaxili prosedurların yerinə yetirildiyi barədə qarşı tərəfi xəbərdar etmək tapşırılıb.

Dövlət başçısı, həmçinin, 2012-ci il avqustun 27-də Riqa şəhərində imzalanmış "Azərbaycan Respublikasının Ailə, Qadın və Uşaq Problemləri üzrə Dövlət Komitəsi və Latviya Respublikasının Rifah Nazirliyi arasında Anlaşma Memorandumu"nun, 2011-ci il noyabrın 2-də Bakı şəhərində imzalanmış "Azərbaycan Respublikasının İqtisadi İnkişaf Nazirliyi və Argentina Respublikasının Elm, Texnologiya və Səmərəli İnnovasiya Nazirliyi arasında elmi, texnoloji tədqiqat və innovasiya sahələrində Anlaşma Memorandumu"nun və 2012-ci il iyunun 7-də Bakı şəhərində imzalanmış "Azərbaycan Respublikasının Kənd Təsərrüfatı Nazirliyi və Latviya Respublikasının Kənd Təsərrüfatı Nazirliyi arasında əməkdaşlıq haqqında Anlaşma Memorandumu"nun təsdiq edilməsi haqqında müvafiq fərmanlar imzalayıb.

Bundan başqa, dövlət başçısı 2011-ci il oktyabrın 18-də Sankt-Peterburq şəhərində imzalanmış "Məhsul və xidmətlərin keyfiyyəti sahəsində nailiyyətlərə görə Müstəqil Dövlətlər Birliyinin Mükafatına təqdimat müsabiqəsi barədə Əsasnamə"də dəyişikliklər edilməsi haqqında Qərar"ın təsdiq edilməsi barədə fərman imzalayıb.