Xəbərlər

Hesablama Palatasında kollegiya iclası keçirilib.

ERtv.Az-ın Palataya istinadən verdiyi xəbərə görə, iclasda `“Azərbaycan Respublikasının 2013-cü il dövlət büdcəsi haqqında” və “Azərbaycan Respublikasının Dövlət Sosial Müdafiə Fondunun 2013-cü il büdcəsi haqqında” Azərbaycan Respublikasının Qanun layihələrinə Azərbaycan Respublikası Hesablama Palatasının Rəyləri geniş müzakirə edilərək təsdiq olunub.  

Rəylərin qanunvericiliyə uyğun olaraq Azərbaycan Respublikasının Milli Məclisində müzakirəyə tövsiyə olunması barədə qərar qəbul edilib.

Kollegiyada, həmçinin, dövlət büdcəsinin əsaslı vəsait qoyuluşundan Ağstafa rayon İcra hakimiyyətinə “Poylu-Xətai-Yenigün-Aşağı Göyçəli” avtomobil yolunun tikintisinə ayrılan vəsaitlərdən istifadənin, dövlət büdcəsinin əsaslı vəsait qoyuluşundan Bərdə rayon İcra hakimiyyətinə “Alpout-Mustafaağalı-Qaratəpə-Nazırlı” avtomobil yolunun tikintisinə və Bərdə şəhər 6 nömrəli uşaq bağçasının əsaslı təmirinə ayrılan vəsaitlərdən istifadənin auditlərinin nəticələrinə dair Hesabat və Rəylər müzakirə olunaraq təsdiq olunmuş, nəzarət tədbirlərinin nəticələri barədə Azərbaycan Respublikasının Milli Məclisinə məlumatların təqdim edilməsi qərara alınıb.

Bundan əlavə, Kollegiya iclasında dövlət büdcəsinin mərkəzləşdirilmiş xərclərindən Azərbaycan Respublikasının Mədəniyyət və Turizm Nazirliyinə və onun tabeliyində olan mədəniyyət müəssisələrinə (seçmə qaydada) ayrılan vəsaitlərin proqnozlaşdırılması və icrasına, dövlət büdcəsinin yerli xərclərindən Lənkəran Mərkəzi şəhər Xəstəxanasına və Lənkəran şəhəri Maliyyə İdarəsi üzrə xəzinə əməliyyatlarının düzgünlüyünə və dövlət büdcəsinin yerli xərclərindən  Cəlilabad rayon Təhsil şöbəsi, Mədəniyyət və Turizm İdarəsi və Cəlilabad rayon İcra hakimiyyətinin Cəlilabad şəhər inzibati-ərazi dairəsi üzrə nümayəndəliyinə ayrılan vəsaitlərin proqnozlaşdırılması və icrasına dair Audit proqramları da təsdiq edilib.