Xəbərlər

Bu gün “Təmiz Şəhər” ASC “Tullantı karkulyatoru” və “Bərk məişət tullantılarının idarəolunmasına dair terminlərin və anlayışların izahı lüğəti” layihələrinin təqdimat mərasimini keçirib.

Mərasimdə “Təmiz Şəhər” ASC-nin idarə heyətinin sədri Zakir İbrahimov bildirib ki, “Təmiz Şəhər” ASC uzunmüddətli geniş maarifləndirmə proqramına başlayıb:

“Əhalinin rifahının yüksəlməsi mütənasib şəkildə istehlak səbətinin artımına gətirib çıxarıb. Ehtiyacdan artıq istehlak israfçılığa və tullantıların miqdarının artmasına səbəb olub. Bu səbəbdən də maarifləndirmə tədbirləri keçirməklə əhalini tullantıları azaltmağa səsləyirik.

Proqramın tərkib hissəsi olan “Tullantı karkulyatoru” tullantıların ətraf mühitə nə cür təsir etdiyini öyrənmək, bu təsirə nəzarət etmək və onu müsbət tərəfə dəyişə bilmək üçün yardımçı olmaqdır. “Bərk məişət tullantılarının idarəolunmasına dair terminlərin və anlayışların izahı lüğəti” isə termin müxtəlifliyinin qarşısını alacaq və vahid terminologiyanın inkişafında əhəmiyyətli olacaq”.

İngiltərənin “EnviroComms” şirkətinin kommunikasiya direktoru Stiven Beyts isə tullantıların azaldılması strategiyalarından və maarifləndirmənin bu prosesdə rolu haqqında iştirakçılara ətraflı məlumat verib, maarifləndirmə proqramının tullantıların idarə olunması sahəsinin inkişafına təkan verəcəyini vurğulayıb.

Toplantıda çıxış edən Sosial İqtisadi Araşdırmalar İctimai Birliyinin sədri Azad Əliyev isə “Bərk məişət tullantıların idarə olunmasına dair terminlərin və anlayışların izahlı lüğəti”n ölkə alimləri, ekoloqları, tələbələr və digər mütəxəssislər üçün elmi araşdırmaların aparılmasında, bərk məişət tullantılarının idarə olunmasının konsepsiyasının icrasında yardımçı vəsait olacağını qeyd edib.