Xəbərlər

ERtv.Az-ın bölgə müxbiri rayon fermerlərinə istinadən xəbər verir ki, ötən il bağlardan 7 min ton feyxoa götürülmüşdüsə, bu il bolluq olduğundan 8-9 min ton məhsul götürmək mümkündür.

Bağlardan bu günə qədər min tondan çox feyxoa məhsulu götürülüb və hazırda yığım davam edir. Fermerləri narahat edən isə bu il alıcıların kifayət qədər olmamasıdır. Onlar bunu Rusiyanın gömrük rusumlarını qaldırması nəticəsində məhsulu qonşu ölkənin bazarlarına çıxaranların sayının kəskin azalması ilə əlaqələndirirlər.

Fermerlər bildirir ki, keçən il və ondan əvvəlki illərdə Moskva, Kiyev şəhərlərinə göndərmək üçün hər maşına 7-7 min 500 dollar alınırdısa, bu il bu rusum Rusiya gömrüyü tərəfindən qaldırılıb. Hazırda feyxoa məhsulu aparanlardan 8 min 400, 8 min 500 dollar gömrük pulu alınır.

Astarada bir neçə soyuducu anbar olmasına baxmayaraq, fermerlər yığdıqları feyxoa məhsulunu tez bir zamanda satmağa üstünlük verirlər. Çünki feyxoa digər sitrus meyvələrindən fərqli olaraq dərildikdən sonra çox tez xarab olur.

Hazırda Astara fermerləri feyxoanı yerindəcə kilosunu 1 manata satırlar. Qarşıdakı günlərdə məhsulun qiymətinin bir qədər də düşəcəyi gözlənilir.