Bakı, 13 sentyabr (ERtv). Azərbaycan prezidenti İlham Əliyev bu gün Türkiyənin ölkəmizdəki fövqəladə və səlahiyyətli səfiri Hulusi Kılıçı diplomatik fəaliyyətinin başa çatması ilə əlaqədar qəbul edib. Həyatının bundan sonrakı hissəsində də Azərbaycanın bir nümayəndəsi, vətəndaşı kimi işləməyə davam edəcəyini vurğulayan diplomat qeyd edib ki, Azərbaycana Vətən xidmət üçün gəlmişdi: "Mən buraya, bu Vətənə xidmət üçün gəlmişdim. Bu müddətdə də çox dəstək, kömək gördüm. Dünənki səfər də tarixi bir səfər idi, hörmətli prezidentim"!

Səfərin çox gözəl keçdiyini vurğulayan prezident İlham Əliyev deyib ki, Türkiyənin baş naziri Rəcəb Tayyib Ərdoğan Azərbaycanın başqa yerləri ilə də tanış olub: "Bu səfərin təşkilində sizin də böyük səyləriniz olub. Ümumiyyətlə, Azərbaycanda çalışdığınız dövrdə iki ölkəni bir-birinə daha da yaxın etmək üçün böyük səylər göstərmisiniz. Biz bunu yüksək qiymətləndiririk. Doğrudan da siz Azərbaycan xalqının dostusunuz. Bura sizin öz vətəninizdir. Əminəm ki, başqa işdə də daim bizimlə əlaqədə olacaqsınız".

Dövlət başçısı Azərbaycanın Türkiyə ilə dövlətlərarası əlaqələrinin inkişafı və möhkəmləndirilməsində xüsusi xidmətlərinə görə Hulusi Kılıçın Azərbaycanın yüksək dövlət mükafatlarından olan “Dostluq” ordeni ilə təltif olunduğunu deyib və ordeni ona təqdim edib.

Bunu həyatında aldığı ən şərəfli mükafat adlandıran Hulusi Kılıç deyib ki, buna layiq ola bilmək də həqiqətən həyatın mükafatıdır: "Bundan əlavə, Zati-aliləriniz tərəfindən bunun dəyərləndirilməsi həqiqətən həyatımın 4 il yarımının bir xülasəsidir, qiymətləndirilməsidir. Mən bunun üçün şükranlığımı, təşəkkürlərimi bildirmək istəyirəm, hörmətli Prezidentim"!

Dövlət başçısı həmçinin deyib ki, səfirin burada fəaliyyəti doğrudan da çoxşaxəli olub: "Cəmiyyətdə də böyük nüfuz qazana bilmisiniz. Mən bilirəm ki, siz Azərbaycanı nə qədər ürəkdən sevirsiniz. Buna görə sizə gələcək fəaliyyətinizdə də uğurlar arzulayıram. Əminəm ki, gələcək illərdə ölkələrimiz bir-biri ilə daha da sürətlə əməkdaşlıq edəcək. Dünən və srağagün hörmətli cənab Baş nazirlə keçirdiyimiz görüşlər bir daha münasibətlərin nə qədər dərin olmasına dəlalət edir".