İsti hava şəraiti ilə əlaqədar olaraq hərbi hissələr xüsusi rejimə keçib. Ölkədə müşahidə olunan kəskin isti hava ilə əlaqədar həkimlər əhaliyə xəbərdarlıq edirlər.

Bakı Şəhər Təcili və Təxirəsalınmaz Tibbi Yardım Stansiyasının həkimi Zemfira Vahidova isti hava şəraitində insanları bir neçə məqama diqqət yetirməyə çağırır: "Günvurmanın qarşısını almaq üçün əhaliyə saat 12-18 radələrində açıq havada az olmaları məsləhətdir. Əgər çölə çıxmağa məcburdurlarsa, çətirlərdən, açıq rəngli papaqlardan, baş örtüklərindən istifadə etsinlər. Pambıq və kətan parçalardan olan geyimlərə üstünlük versinlər".

Qeyd edək ki, yay mövsümü başlayandan günvurma ilə bağlı 50 nəfər təcili yardıma müraciət edib. Onlardan 13 nəfəri xəstəxanaya yerləşdirilib. Ötən gün isə Pirallahı qəsəbəsində işləyən 3 nəfər neftçini gün vurub. Onlara ilkin tibbi yardım göstərilib.

Kəskin istilərlə bağlı orduda da xüsusi rejim tətbiq olunur. Müdafiə Nazirliyinin mətbuat xidmətindən verilən məlumata görə, istilərlə bağlı əsgərlər kazarma şəraitində saxlanılır. Onların günvurmadan qorunması üçün əlavə tədbirlər görülür. Sinoptiklər isə kəskin istilərin davamlı olmayacağını deyirlər.

Qeyd edək ki, bu gün ərzində dəniz suyunun temperaturunun da kəskin artacağı, Türkan, Hövsan, Şıx çimərliklərində, hətta 28-29 dərəcə olacağı gözlənilir.