XİN başçısı Kolumbiya, Argentina, Uruqvay və Peruya səfər edəcək. İyulun 31-də Parisdə Azərbaycan və Fransa xarici işlər nazirlərinin görüşü nəzərdə tutulur

Gələn həftə Azərbaycanın xarici işlər naziri Elmar Məmmədyarov bir sıra Latin Amerika ölkələrinə rəsmi turneyə çıxır. Bu barədə jurnalistlərə Azərbaycan Xarici İşlər Nazirliyinin mətbuat xidmətinin rəhbəri Elman Abdullayev bildirib.

XİN başçısı ilk olaraq iyulun 23-də Kolumbiyaya gedəcək. Daha sonra Elmar Məmmədyarovun Argentina, Uruqvay və Peruya səfəri nəzərdə tutulur. Səfər zamanı ölkələr arasında siyasi və iqtisadi sahəsində əməkdaşlıq perspektivləri müzakirə olunacaq.

Səfərin çərçivəsində biznes-forumların keçirilməsi də nəzərdə tutulub.

Latin Amerikas turnesini başa vurduqdan sonra Elmar Məmmədyarov iyulun 31-də Parisə birgünlük rəsmi səfərə gedəcək. Səfər çərçivəsində onun Fransanın xarici işlər naziri ilə görüşü nəzərdə tutulub.