Milli Məclisin sədri Oqtay Əsədov Böyük Britaniya parlamentinin Azərbaycanla dostluq qrupunun üzvü Lord Lairdin başçılıq etdiyi nümayəndə heyəti ilə görüşüb. Bu barədə Milli Məclisin mətbuat xidmətindən məlumat verilib.

Görüşdə O. Əsədov ingiltərəli deputatlara Milli Məclisin fəaliyyəti, qanun yaradıcılığı sahəsində görülmüş işlər barədə məlumat verib. Lord Laird isə ölkəsinin Azərbaycanla əlaqələrin hərtərəfli inkişafına böyük maraq göstərdiyini və Cənubi Qafqazda gedən prosesləri diqqətlə izlədiyini deyib. O, Azərbaycan üzrə parlament qrupunun üzvü kimi Milli Məclislə əməkdaşlığın gələcəkdə də dərinləşməsinə çalışacağını qeyd edib.