Azərbaycan Prezidenti İlham Əliyevin himayəsi ilə iyunun 28-dən iyulun 1-dək Bakıda Krans Montana Forumunun illik sessiyası keçiriləcək.

Mədəniyyət və Turizm Nazirliyindən bildirmişlər ki, Forum çərçivəsində həm turizm sessiyası, həm də yeni liderlərin görüşü mədəniyyətlərarası dialoqa həsr ediləcəkdir.

Forumda dörd ölkənin dövlət başçısının, baş nazirlərin, nazirlərin və digər hökumət nümayəndələrinin iştirakı nəzərdə tutulur.

Tədbirin əsas məqsədi 2013-cü ildə keçiriləcək növbəti Ümumdünya Mədəniyyətlərarası Dialoq Forumu və mədəniyyətlərarası dialoqa dair Bakı Prosesi ilə bağlı təşviqatın aparılması və ölkəmizin bu dialoqun mərkəzi olması barədə təbliğatın gücləndirilməsidir.